Azərbaycanda vəzifəyə hələ də varlanmaq vasitəsi kimi baxırlar - Kadrların dəyişdirilməsi də problemi həll etməyəcək

2021-ci ildə Azərbaycan Respublikası Maliyyə Nazirliyinin Dövlət Maliyyə Nəzarəti Xidməti tərəfindən ümumilikdə 144 nəzarət obyektində aparılmış tədbirlər nəticəsində 103,6 mln. manat məbləğində artıq və əsassız ödənişlərə yol verilməsi aşkar edilib.

Nəzarət tədbirlərindən 59-u Dövlət Maliyyə Nəzarəti Xidmətinin iş planına əsasən, 77-si Respublika Baş Prokurorluğunun və Dövlət Təhlükəsizlik Xidmətinin qərar və məktublarına, 8-i isə vətəndaş müraciətləri üzrə mərkəzi icra hakimiyyəti orqanlarında, onların tabeli qurumlarında, dövlətə məxsus hüquqi şəxslərdə və bələdiyyə orqanlarında aparılıb.
Həmin qurumların siyahısında XİN, ƏƏSMN, Mədəniyyət Nazirliyi və 3 icra hakimiyyəti orqanının da adı var. Eyni zamanda TƏBİB-in tabeliyində olan bir sıra xəstəxanalarda, Təhsil Nazirliyində, “Azərxalça” ASC-də və digər qurumlarda da bənzər halların olduğu müəyyən edilib.

Xidmət tərəfindən aparılan nəzarət tədbirləri üzrə artıq və əsassız ödənilmiş vəsaitlər məsul vəzifəli şəxslər tərəfindən dövlət büdcəsinə ödənilərək bərpa edilib, prokurorluq və hüquq-mühafizə orqanlarının qərarlarına əsasən aparılan nəzarət tədbirləri ilə aşkar edilən artıq və əsassız ödənişlərin bir hissəsi ibtidai istintaq zamanı təqsirkar şəxslər tərəfindən nağd qaydada dövlət büdcəsinə ödənilməklə bərpa olunub, qalan hissəsinin bərpası isə məhkəmə qərarlarına əsasən, təqsirkar şəxslərin əmlaklarına yönəldilməklə hazırda müvafiq dövlət orqanları tərəfindən davam etdirilir.

Dövlət Maliyyə Nəzarəti Xidməti tərəfindən müxtəlif qurumlarda aşkarlanan mənimsəmə halları ilə bağlı “Şərq”ə danışan millət vəkili Razi Nurullayev qeyd edib ki, rüşvətxorlara və korrupsionerlərə qarşı aparılan mübarizə effektiv deyil və qarşısı alına bilmir.

“Sadəcə metodlar, yanaşmalar dəyişib. Ancaq dövlət vəzifəsinə münasibət dəyişməyib. Bu gün Azərbaycanda ən böyük problem budur. İnsanları, kadrları dəyişdirmək olar. Amma ümumilikdə dövlət postlarına, insanlara qarşı məsuliyyətə münasibət dəyişməsə, bu hallar təkrarlanmağa davam edəcək. Buna görə də, birinci növbədə dövlətçiliyə yanaşma şəkli dəyişməlidir. Dövlət vəzifəsinə varlanmaq üsulu kimi baxılmamalıdır.

Dünyanın bir çox ölkələrində insanları vəzifəyə təyin etmək üçün danışıqlar aparılır. Hətta bir çox bacarıqlı, perspektivli insanlar həmin vəzifələrə getmək istəmirlər. Düşünür ki, mən başqa yerdə daha çox pul qazana bilərəm. Ona sərf etmir. Ancaq bizdə kimə təklif etsən heç imtina etməyəcək. Çünki həmin vəzifədə təkcə əməkhaqqı ilə yox, digər vasitələrlə də varlanma imkanı olacaq. Rüşvət almaq, dövlət büdcəsini öz mənfəəti üçün istifadə etmək fürsəti yaranacaq.
İnsanlar düşünməlidir ki, xidmət etməyə gedir və əmək haqqı alır. Düşünməlidirlər ki, yaxşı işləsə mükafatlar veriləcək, istirahətə pulsuz gedəcək, ailəsinin müalicəsi pulsuz olacaq və s.

Bunlar dövlət tərəfindən tam olaraq təmin olunandan sonra onlar vəzifəsinə xidmət üsulu kimi baxsa, rüşvətxorluq olmayacaq. Amma hələ ki, bu yoxdur. Kadrların dəyişdirilməsi də məsələləri həll etməyəcək”.