Gündəm / Şou
17 avqust 2022
22
Azərbaycanda kişilər və qadınlar niyə xəyanət edirlər? - AKTUAL
Azərbaycanda son zamanlar boşanmaların sayındakı artım cəmiyyətdə müzakirələrə səbəb olur.
Ayrılmağa, boşanmağa qərar verən insanları bu addımı atmağa vadar edən səbəblər içərisində xəyanət də yer tutur. Sosiaoloq və pxisxoloqlar hesab edirlər ki, maddi sıxıntılarla yanaşı, ərlə-arvadın biri-birinə xəyanəti də boşanmanı yaradan səbəbdir. Ailədaxili münaqişələr, zorakılıq da bundan irəli gəlir.
Bəs insanlar niyə ömürlərini birgə keçirdikləri insana xəyanət edirlər? Azərbaycanda xəyanəti yaradan səbəblər hansılardır? Mövzu ilə bağlı Cebhe.info-ya danışan psixoloq Gülnar Orucova bu gün insanların biri-birinə uyğunlaşmadan boşandıqlarını deyib:
“Boşanmalar hər zaman cəmiyyətdə olub. Əvvəllər daha az rast gəlinirdi, son dönəmlərdə sayı sürətlə artıb. Boşanmaların sayının artması ilə yanaşı, başqa bir şeyi müşahidə edirik.
Əvvəllər 3, 6 ay və bir il sonra boşanan qadınlar yox idi, amma indi boşanan qadınların əksəriyyəti qısa müddətdən sonra boşanır. Evliliklər qısamüddətli olub. İki insan 3 il müddətində ailəli qalmalıdır, 3 il ərzində onların biri-birinə uyğunlaşması gedir. Üç ildən sonra ailədə hansısa problem, xarakter uyuşmazlığı, şiddət və digər nələrsə varsa, bu müddətdən sonra ayrılmaq üçün qərar versələr daha yaxşı olar”.
Psixoloq hesab edir ki, bu gün boşanmanın bu gün əsas motivi xəyanətdir:
“Bu gün cəmiyyətdə xəyanətin sayı kütləvi şəkildə artıb. Xəyanət etməyən kişi yoxdur. Hətta dindarlar, hacılar dini əlində əsas tutaraq, yəni bizim dörd xanımla evlənmək icazəmiz var deyib, bundan istifadə edə bilirlər. Əvvəllər informasiya aldığımız mənbələr az idi. İndi bir kişi xəyanət edirsə, onu sosial şəbəkələr göstərir. Nümunə üçün Fövqəladə Hallar Nazirliyində işçilər arasındakı münasibətin görüntülərini göstərək. Hər kəs bu görüntülərə bir cür münasibət bildirdi. Desəm ki, sosial şəbəkələr zərərlidir, amma hər bir şeyin müsbət və mənfi tərəfləri var. Yəni həyatda zərərli heç nə yoxdur, zərərli bir hədd var, yəni o həddi hər zaman gözləməliyik, baryeri aşmamalıyıq.
Sosial şəbəkədə biri ayrılma səbəbini deyir, digəri də ondan daha artığına dözdüyünü, niyə boşanmadığını fikirləşir. Ailəni tanıyan, tanımayan hər kəs fikir bildirir. Təbliğat getdikcə bunlar daha çox yayılır, mənfi hallarla rastlaşırıq. İntiharlar təbliğ olunur, göstərilir, insan gördüyünü daha tez mənimsəyir”.
Gülnar Orucova boşanmalarda hər iki tərəfi günahlandırıb:
“Bugünkü gündə sosial şəbəkələrdə tanışlıq asanlaşıb. Tanış olduqdan sonra xəyanətlər başlayır. Qadın intim münasibəti doğru-düzgün qavraya bilmir. Kişilər də buna görə başqa qadınlara üz tutur.
Bu gün boşanma səbəblərində maddi durum, ailədaxili şiddət, alkoqol, zərərli vərdişlər cəmi 10 faizdir. Digər faizi xəyanət təşkil edir. Əvvəllər qınama vardı, indi o qadınları qınamırlar. Valideynlər özləri belə qızlarına səbr, təmkin aşılamırlar. Böyüklərin ailəyə doğru olmayan müdaxiləsi olduqca boşanmaların sayı daha çox olacaq. Həyat yoldaşımızı etdiyi və etmədiyi nədəsə qınamayaq. Bu gün həyat yoldaşınızı şantaj yoluyla əldə etməyə çalışmayın, onlara sevgi, diqqət göstərin. Qısqanclıq sevgi göstəricisi ola bilər, amma bu həddində olmalıdır. Kişilər onları daimi yoxlamadan bezərək xəyanət edirlər. Onu yoxlamaq yerinə özünüzə, ruhunuza zaman ayırın, sevgi göstərin. Kişilər özgüvənli, baxımlı, idmanla məşğul olan, formada qalan, qidasına nəzarət edən qadınları sevir”.
