"Euronews” Azərbaycandan maraqlı reportaj hazırladı - VİDEO

Fransa və Avropanın məşhur telekanalı olan “Euronews” Azərbaycandan, o cümlədən Şəki şəhərindən və İsmayıllıdan maraqlı reportaj hazırlayıb.

Reportajda Avropa və Asiyanın kəsişməsində yerləşən Azərbaycanda araşdırmaq üçün bir çox maraqlı mətləblərin olduğu vurğulanır. Tanınmış reportyor Monika Pinna reportajda Qafqaz dağlarından Xəzər dənizinin sahillərinə qədər səyahəti zamanı Azərbaycanın zəngin ənənələri haqqında ətraflı məlumat verib.

“Euronews” və “Euronews.com”un “Azərbaycanı kəşf et” rubrikasının bu həftəki rubrikasında yolboyu Odlar Yurdunun gizli xəzinələrini kəşf edərək Qafqaz dağlarından Xəzər dənizinin sahillərinə səyahət edəcəyik”, - reportyor bildirib.

“Şəkinin memarlığı və tarixi o qədər unikaldır ki, Şəki YUNESKO-nun Ümumdünya İrsi siyahısına salınıb", - Böyük Qafqaz dağlarının ətəyində qədim dövrlərdən indiyə kimi alıcıların və tacirlərin qədim dayanacağı Şəki şəhərinə səfər edən Monika Pinna bildirib.

“İpək Yolunun qızıl dövründə Şəkidə ipəkçilik, barama ticarəti və xam ipəkçilik əsas iş idi. Bu gün də ipək və ticarət canlı şəhərin əsasını təşkil edir. Karvansaraylar səyyahlar və tacirlər üçün ənənəvi yol kənarındakı mehmanxanalar olub və bu günə qədər gəlib çatmış iki möhtəşəm nümunə var.

Şəkidə 1762-ci ildə tikilmiş gözəl Xan Sarayını mütləq ziyarət etməlisiniz. Sonra əsrlər boyu sənətkarlar şəhəri kimi tanınan Lahıc qəsəbəsinə səfər edirik. Amma onu məşhur edən kümçülər olub və biz nəsillər boyu mislə işləyən ailə biznesi ilə tanış oluruq”, - reportajda qeyd edilir.