WSJ: İsrail 2025-ci ildə İranın nüvə obyektlərinə zərbələr endirə bilər

ABŞ kəşfiyyat agentlikləri İsrailin bu il Tehranın zəifləməsindən istifadə edərək İranın nüvə obyektlərinə genişmiqyaslı zərbələr endirmək imkanını nəzərdən keçirdiyi qənaətinə gəlib.

Bu barədə “The Wall Street Journal” qəzeti mənbələrə istinadən məlumat yayıb.

Bu nəticə keçmiş ABŞ Prezidenti Cozef Bayden administrasiyasının son günlərində hazırlanmış analitik hesabata daxil edilib. Sənəddə 2024-cü il ərzində İranın imkanlarının zəifləməsindən sonra regionda hərbi fəallığın davam etməsi riskləri vurğulanıb.

Kəşfiyyat məlumatları ilə tanış olan iki mənbənin məlumatına görə, İsrail belə zərbələr üçün Donald Tramp administrasiyasının dəstəyini almağı planlaşdırır və onu keçmiş prezident Cozef Baydenlə müqayisədə hücumu dəstəkləməyə daha meyilli hesab edir.

Bundan başqa, İsrail tərəfi Tehranın nüvə silahı yaratmasının qarşısını almaq üçün vaxtın tükəndiyindən narahatdır. Amerikalı rəsmilərdən birinin sözlərinə görə, bu nəticələri təkrarlayan ikinci hesabat artıq Tramp administrasiyasının ilk günlərində təqdim edilib. Hərbi ekspertlərin fikrincə, İranın yaxşı möhkəmləndirilmiş nüvə obyektlərinə hücum etmək üçün İsrailə döyüş sursatı və texniki yardım da daxil olmaqla Amerika dəstəyi lazım olacaq.